CURRENT NEWS

Saturday, June 24, 2017

JAFO:WATENDAJI WAZEMBE HAWANA NAFASI MRADI WA RBF

 Naibu Waziri wa Nchi,Ofisi ya Rais,Tamisemi, Selemani Jafo akifungua mkutano wa RBF uliowashirikisha watendaji kutoka Mikoa nane inayotekeleza mradi wa RBF nchini.

Dk.Pembe Msimamizi wa Mradi wa RBF TAMISEMI akiwakilisha mada katika mkutano huo
 Naibu Katibu Mkuu Tamisemi, Afya akitoa ufafanuzi wa Ilani ya uchaguzi ya CCM ya mwaka 2015 na juu ya uboreshaji wa huduma za Afya
 Baadhi ya Wakurugenzi wa TAMISEMI wakifuatilia kwa makini wakati wa Mkutano wa RBF uliofanyika Jijini Mwanza.
Mwakilishi wa Benki ya Dunia bibi Gayle Martin akimueleza jambo mmoja wa washiriki wa Mkutano huo wa RBF.


Baadhi ya Mameya na Wenyeviti wa Majiji Manispaa na Halmashauri wakiwa katika picha ya pamoja na Naibu Waziri wa Nchi Ofisi ya Rais TAMISEMI Selemani Jafo.

......................................................................
Serikali imesema haita wavumilia watendaji watakaoshindwa kusimamia ipasavyo mradi wa Malipo kwa Ufanisi katika kuboresha utoaji wa huduma za Afya “Results Based  Finance” (RBF) ambao hivi sasa unatekelezwa katika mikoa minane hapa nchini.


Akifungua kikao kinacho wakutanisha  Makatibu Tawala wa Mikoa, Mameya na Wenyeviti wa Halmashauri, Wakurugenzi wa Halmashauri, Waganga Wakuu wa Mikoa na Wilaya, Maafisa Mipango kutoka mikoa inayotekeleza mradi wa RBF, kilichofanyika Jijini Mwanza, Naibu Waziri wa Nchi Ofisi ya Rais Tawala za Mikoa na Serikali za Mitaa (TAMISEMI) Mh. Seleman Jafo, amesema ni lazima kufanyike mabadiliko katika utoaji wa huduma za afya kuleta matokeo tarajiwa.


Naibu Waziri Jafo ametawataka Mameya na Wenyeviti wa Halmashauri  kuhakikisha kuwa utekelezaji wa Mradi wa RBF unakuwa ni ajenda ya kudumu katika vikao vinavyofanyika kila mwezi ili kuwezesha kujua kiasi cha fedha zilizoletwa kwa ajili ya utekelezaji wa Mradi huo ili kuweza kuboresha huduma za afya kwa wananchi.


Katika hatua nyingine Waziri Jafo, ameiomba Benki ya Dunia ambayo ndiyo mfadhili wa mradi wa RBF kuangalia uwezekano wa kuwezesha utekelezaji wa Mradi wa huu kufanyika nchi nzima ili kuboresha utoaji wa huduma za afya nchini kote.


Naye Mwakilishi  wa Benki ya Dunia Bibi Gayle Martine ameipongeza Serikali ya Awamu ya Tano kwa hatua ambazo inazichukua katika kuhimiza suala zima la uwajibikaji na kusema kuwa hali hiyo imeongeza shauku ya Wadau wa Maendeleo kuendelea kuunga mkono jitihada zinazofanywa na serikali katika kuleta mabadiliko ya kiutendaji na utoaji wa huduma za jamii.


Akizungumza katika kikao hicho, Naibu Katibu Mkuu Ofisi ya Rais- TAMISEMI anayeshughulikia Afya Dkt. Zainab Chaula amesema ili kufikia malengo chanya yanayotarajiwa  katika uboreshaji wa utoaji wa huduma za Afya kila mmoja katika eneo lake inabidi kutengeneza mpango kazi ambao ndio utakuwa dira ya utendaji kazi ili kuleta matokeo chanya.


Mradi wa Malipo kwa Ufanisi katika Kuboresha Huduma za Afya nchini Ulianza mwaka 2015  katika mkoa wa Shinyanga kama eneo la majaribio  ambapo hadi hivi sasa unatekelezwa katika mikoa nane ambazo ni Mwanza, Shinyanga, Pwani, Simiyu, Geita, Kigoma, Tabora na Kagera


 
Copyright © 2014 Mkono Wangu Production Designed by EvMak Tanzania